Xalqimizning shevasi – o‘zbek tili mevasi...
O‘zbek tilida saqlanib kelayotgan va joylarda aholi shevasi nomi bilan e’tirof etiladigan, ildizi va ma’nosi asosli so‘zlar talaygina. Ammo, afsuski, bugun ularning aksariyatini lug‘at yoki hudud aholisi ko‘magidagina tushunib yetamiz.
Quyida shunday so‘zlarning bir qismini e’tiboringizga havola qilamiz:
ABDAV (Jizzax) Tomdan yog‘in suvi tez oqib tushib ketishi uchun tom sathida qilinadigan qiyalik; obdov.
ABDIRA (Iqon) Sandiq.
ABRAV q. obrav. – Shu abravda mening qadamim tegmagan joy qolmagan, hamma biladi.
ABRIK (Qashqadaryo) Binafsha rang mayda gullar ochadigan chala buta tog‘ o‘simligi.
ABRO‘K q. abrik. Keng dala.
ABRO‘Y (Jizzax) q. Abrik
ADAN (Xorazm) Poygak.
ADARG‘I (Surx.-Qashq.) Qoqma gilamni to‘qish uchun alohida o‘rmaksoz.
ADAS 1. Yasmiq. 2. (Samarqand) Burchoq.
ADOQ (Qashqadaryo) Quyi.
ADOQ-BOSH q. Bosh-adoq.
ADOQLAMOQ I (Qashqadaryo) Quyiga qarab yurmoq.
ADOQLAMOQ II (Jizzax, Qashqadaryo) Tugamoq.
AHMOLLAMOQ Bo‘g‘izlamoq.
AHMON-DAHMON // ahman-dahman (Jizzax, Qashqadaryo) Bahor boshlanishidagi sovuq kunlar bo‘lib, 4–10 martga to‘g‘ri keladi.
Manba: Musayeva Feruza, “O‘zbek xalq so‘zlari” lug‘at kitobi.
Hasan Abdugʻaniyev tayyorladi.
